मुसळधार पावसामुळे कचऱ्याचा ढिगारा कोसळल्याची प्राथमिक माहिती; बचावकार्य युद्धपातळीवर सुरू
मोशी | प्रतिनिधी
मोशी येथील कचरा डेपो परिसरात आज भीषण दुर्घटना घडली. मुसळधार पावसाच्या पार्श्वभूमीवर ‘वेस्ट टू एनर्जी’ प्रकल्पाच्या इमारतीचा काही भाग कोसळल्याची प्राथमिक माहिती समोर आली आहे. या दुर्घटनेत सुमारे १५ कर्मचारी ढिगाऱ्याखाली अडकल्याची भीती व्यक्त करण्यात येत आहे.
घटनेची माहिती मिळताच अग्निशमन दल, आपत्ती व्यवस्थापन पथक, पोलीस आणि स्थानिक प्रशासन घटनास्थळी दाखल झाले असून बचावकार्य युद्धपातळीवर सुरू आहे. जेसीबी आणि इतर यंत्रसामग्रीच्या साहाय्याने ढिगारा हटवून अडकलेल्या कर्मचाऱ्यांचा शोध घेण्याचे काम सुरू आहे.
प्राथमिक माहितीनुसार, मुसळधार पावसामुळे परिसरातील परिस्थिती गंभीर बनली असून दुर्घटनेमागील नेमके कारण अद्याप स्पष्ट झालेले नाही. प्रशासनाकडून घटनेची चौकशी सुरू करण्यात आली आहे.
या दुर्घटनेतील जखमी, मृतांची संख्या किंवा अडकलेल्या कर्मचाऱ्यांचा अधिकृत आकडा अद्याप जाहीर करण्यात आलेला नाही. बचावकार्य पूर्ण झाल्यानंतरच अधिकृत माहिती समोर येण्याची शक्यता आहे. नागरिकांनी अफवांवर विश्वास न ठेवता प्रशासनाच्या अधिकृत माहितीकडे लक्ष देण्याचे आवाहन करण्यात आले आहे.